السلام عليكم ورحمة الله وبركاته



والله زماااااان عن كتابة موضوع ..


احس كأني ما كتبت موضوع بحياتي قاعد اتذكر شلون انسق الموضوع وشلون اغير الخط .. ( نصااااب )


والله البعد عن المنتدى واهله بليه ..


عسى الله لا يفرقنا اجمعين ..



المهم ..


طبعا ً لأني مو خبير أدبي فا حابت أشارك في المسابقه بمواقف من حياتي ..
وطبعا ً كما أذكر مافي إشكال على ذلك ..



>>..خلف الكواليس ..<<


احترت في اختيار عنوان لما سأسدحه لكم هنا .. فا ارتاح خاطري لهذا العنوان ..
طبعا ً أحبائي حامل المسك واخوه العزيز بحر يدرووون بسوالفي هذي ..

فا لا تحرقوا على الموضوع

المهم ..


كنا في رمضان وقد بلغني اني راح اصلي بالناس في العشر الاواخر من رمضان ..
ولكن لم يتم التأكيد على الموضوع ..!

فا قلت خيره ان شاء الله وما راجعت على اللي ممكن اني أقرااه في الصلاة ..
ووصلنا الى نصف الشهر ولم يبلغني تأكيد على هذا الكلام فقلت لا خلاص كنسلوا السالفه ..

وفي ليلة الـ18 دق علي ابوي وقالي تعال البيت الحين .!

رحت البيت ..

المهم قالي بتصلي بالناس ومش عارف ايش وهالسوالف بس قالي راح تقرون عشرين جزء في العشر ليالي ولازم تذهب نفسك ..

انا عن نفسي مو متذكر من العشرين الا 5 !! ولو درى ابوي كان راح يشنقني ..!


المهم صلينا بالناس والحمدلله الامور كانت طيبه ..


وفي يوم كنت مريض جدا وصوتي رايح وكحه وحالتي بالبلى ( كالعاده )

ويصادف مع كل هذا ان اثنين من الشباب غايبين مو معانا ..

يعني انا وواحد بس بنصلي بالناس وقالوا لي انت عليك اول اربع ركعات ..


طبعا محد يدري باللي فيني ..

فاا رحت ببدي الصلاة والناس ناطره الحين صلاة القيام ..

وقفت وقعدت اكلم نفسي ..: الناس راح يطقوني راح يذبحوني والي راح يشيل العقال وعلى راسي بسبب صوتي والنشاز .. المهم قلت الي بيصير يصير شسوي بعد ..

الله اكبر ..

بدأنا الصلاة ..

قلت دعاء الاستفتاح ..

وبعدين .

حم . تنزيل الكتاب من الله العزيز الحكيم .. !


وهني سمعت تهليل وراي وتكبير والناس الي يصارخ فيهم اليهال والي يضحك والي يقول الحمدلله رب العالمين والي يقولي الفاتحه .. !
وكل الي في نفسه كلمه يقولها قالها !


وانا قاعد على اعصابي والمشكله اني لسه ما استوعبت اني نسيت الفاتحه ..

الى ان سمعت واحد يقول الفاتحه جان استوعب ..

فا قريت الفاتحه وقريت الاحقاف وراها وصليت الركعتين وانا على اعصابي ..

وخفت بعد ما اسلم اني اطالع الناس والحمدلله سجدت سجدتين السهو فاا غفرت لي عند الناس ..

ولما طالعت رفيجي بعد الصلاة اشرت له قلت له حبيبي صلي مكاني ترى بنطق في الصلاة فا تكفى تعال شيل الليله .. وجزاه الله خير كفىى ووفى ... وانزف من الناس ..


رديت المسجد الي كنت معتكف فيه واذا بحامل المسك قاعد جان يقوول :
شباب احمد يبي يصلي فينا الفجر اليوم .. بس احمدوو لا تنس الفاتحه .. محد فاهم شسالفه ..

فاا ضحك حامل المسك وقالهم وصارت فضيحه بين الربع كل من شافني ضحك علي ..

ومرت الايام وجاء رمضان العام الثاني ....


وصار لي نفس الموضوع ابلغوني بالصلاة قبلها بيومين بس الاقوى ان الصلاة بدون مصحف على حفظك يعني ..!

واهني البلوه كلها لاني ناسي تقريباً واول اربعة ايام علي انا وواحدمن الشباب ..


فا قمت اراجع الي بقرأه في الليله واسمعه على ابوي والوالد لا شافني غلط بشي سمعني محاضره بالزف ان هذا مو منظر واحد بيصلي بالناس وهالكلام كله ..
وبيوم كنت مو مراجع على السوره من قبل مثل العاده ونصيبي كان اني اراجع عليها قبل الصلاة بجم ساعه فاا كنت حاسس اني بخرف بخرف ..

واللي اكد لي اني راح ابدع بهالليله اني سألت واحد من الشباب شفته ماشي بالشارع قلت له اسألني اي سؤال بسورة يس قالي مقطع من ايه ما عرفت اكمل وراه ..!

واهني اصبح الشك .. يقين ..

رحت صليت اول ركعتين تمام ولله الحمد والاعجب اني كنت خايف من اول السوره لاني مو مراجعها عدل .. فلما حانت لحظة الركعتين الباقيه كنت مرتاح نفسيا لاني مراجعها وحافظها عدل ..

قريت عدل باول ركعه وصليت تبقى ركعه الحين ..

وفجأه بالركعه الثانيه صطلت عند ايه ..!

وصرت اعيد فيها ..

وحاولت اني ابين اني ابي مساعده ردوني بتذكر يا جماعه محد فهم ..


والمشكله الناس عبالهم متأثر او في خشوع بالايه !


وعدت الايه الى ان استوعب ابوي لانو كان يصلي وراي ..

فقام ردني وانا قاعد اقرأ ..( حتى ما سمعت ولا كلمه )


فاا انا صرت متوهق فرحان معصب ومرعوب ..

فرحان ان في احد فهم ..
ومعصب لاني ما سمعت عدل ..
ومرعوب لاني ماشاء الله بدعت يعني ..


وفجأه سكت على اساس ابوي يعيد الايه مره ثانيه و الحبيب مو راضي يعيد الايه ..!

صطلت عدت الايه انا مره ثانيه وكررتها وسوى ابوي نففففففس الحركه كلمني وانا اقرأ فا ما سمعت شي ..

سكت على انه يعيد الايه ما عاد جان اقوله بنص الصلاة ..

.. نعم !!

انا قلت نعم .. ولقيت الناس سكتوا وحسيت ان في جم واحد يبي يبجي من الضحك ..

وقعدت اقووول انا شسويت وحاولت ارقع بس ماكو ايه تبدأ بنعم في السوره !!!


جان ابوي الله يحفظه ردني اخيرا وكملت الركعه وسلمت وانحشت من المسجد وما صليت فيه مره ثانيه .. !


ورحت مسجدنا الي معتكف فيه ..

واذا بالحبيب حامل المسك قاعد .. ويقولي ..

نعم يا بابا .. بتقول ايه .. !

ومدري منين عرف كان لسه الموضوع ما كمل ساعه .. والشباب ماتوا علي من الضحك ..


فا سبحان الله ..

الانسان تصير فيه حركات مو متوقعه نهائيا ً ..

بس ربنا ستر والكل يذكر السالفه ويدعي لي .. طبعا يضحك قبلها


وسبحان الله صار موقف ثالث برمضان الي بعده بس مو فيني ..


كنت قاعد اصلي التراويح بالمسجد الي جمب بيتنا ..

فا قال الامام .. ولا الضالين ..

قلنا : ااااميييييين ..

وبعدين الامام بنص القرأه وصل الى ايه قال فيها .. :


وان كنتم من قبله لمن الضااااااااليييييين ..

...
...
...
...


ما توقعت الي بيصير ..


الشيخ قال ضااااليييين والناس قالوا من وراه ..

آآآآمييييين!!!

تخيلوا الناس النايمه !!! انا عن نفسي مت من الضحك وطلعت من المسجد وقعدت مهتر انا واثنين من ربعي ..! والامام بعد الصلاة يقول مت على نفسي من الضحك بس مسكت نفسي علشان لا تخترب علينا الصلاة .. !!


يعني كانت نكته السالفه ..


-------

هذا الي حبيت اشاركم فيه من قصصي ومغامراتي ..


وطبعا ً صليت بالناس وراها جم سنه والحمدلله كانت كويسه والناس انبسطوا منا وطلبوا من الوزاره نصلي فيهم مره ثانيه ..


والحمدلله تعلمنا الدرس

بس بالاحراج ..


محبكم ..:: سمط الدرر ::..



( طورها .. ولتكن لك بصمه )

المشاركة الأصلية كتبت بواسطة أم ريان هههههههههههه ....إبداع x إبداع حتى بالمواقف إبدااااع .... سوبرسمط بصحيييييييح .... أشكرك سمط ضحكتني وأنا قافلة أخلاقي .... تحياتي

أضحك الله سنكم وأعلى شأنكم


الابداع شوفتكم يمه ..
الله يبارك فيج ..

ويجعل ايامج كلها سعاده ..

المشاركة الأصلية كتبت بواسطة وجه القمر سلمت يداك سوبر سمط أسلوب رائع وبصراحة مواقف حلوة ربي يكرمك دمت مبدع

هلا والله بقمر المنتدى

نورتي صفحتي بطلتج البهيه ونورج القمري :)

الله يبارك فيج يارب وتسلمين لي ..

ربي يبعدج عن الاحراج ..